ការអភិវឌ្ឍរាងកាយរបស់កុមារអាយុពី ២ ទៅ ១០ឆ្នាំ
ដោយ CANDICE HUGHES
នៅ អាយុចន្លោះពីកើតរហូតដល់ ១០ឆ្នាំ កូនរបស់អ្នកបានឆ្លងកាត់ការលូតលាស់ និងការផ្លាស់ប្តូរយ៉ាងច្រើន។ កូនរបស់អ្នកបានផ្លាស់ប្តូរខាងផ្នែករាងកាយ ស្មារតី និងអារម្មណ៍។ ទោះជាយ៉ាងណា កុមារទាំងអស់មានភាពខុសគ្នា ហើយអាចលូតលាស់ និងអភិវឌ្ឍក្នុងអត្រាផ្សេងៗគ្នា។ ប្រសិនបើអ្នកមានក្តីបារម្ភអំពីការលូតលាស់ ឬជំនាញនានារបស់កូនអ្នក ចូរទាក់ទងគ្រូពេទ្យប្រចាំគ្រួសាររបស់អ្នកដើម្បីធ្វើការវាយ តម្លៃពីការអភិវឌ្ឍន៍។
អាយុពី ២ ដល់ ៤ឆ្នាំ
នៅ អាយុ ២ឆ្នាំ កូនដែលអ្នកបានផ្តល់កំណើតបានឆ្លងកាត់ការភើ ក្អួត និងទន់ខ្សោយ។ យោងតាម PBS ក្នុងអាយុប៉ុណ្ណេះ កុមារគួរចាប់ផ្តើមចេះរត់ លោតនៅនឹងមួយកន្លែង ទាត់បាល់ និងដើរចុងជើង។ នៅពេលកុមារឈានដល់អាយុ ៣ឆ្នាំ កុមារនឹងអាចមានសមត្ថភាពធ្វើរឿងរ៉ាវកាន់តែច្រើនជាងនេះ រួមទាំងគូររង្វង់ និងគូររូប ដោតអង្កាំ បើកទំព័រសៀវភៅដែលគាត់ចូលចិត្ត ឬកាន់ខ្មៅដៃដោយប្រើម្រាមដៃតូចៗរបស់គាត់ជំនួសឲ្យការកាន់នឹងដៃ។ PBS ក៏បានឲ្យដឹងផងដែរថា នៅអាយុ ៤ឆ្នាំ ភាពត្រឹមត្រូវរបស់គាត់ក្នុងចលនាតូចតាច នឹងកើនឡើងយ៉ាងខ្លាំង ដោយអាចឲ្យគាត់បង្កើតជាសត្វពស់ និងវត្ថុផ្សេងៗពីដីឥដ្ឋ និងដាក់ឧបករណ៍លេងទៅក្នុងរន្ធ។ គាត់នឹងកាន់តែមានទំនុកចិត្ត ហើយដូច្នេះគាត់អាចដើរថយក្រោយ ឡើងនិងចុះជណ្តើរដោយគ្មានជំនួយ និងអាចដាំដូងបាន។
អាយុពី ៥ ដល់ ៦ឆ្នាំ
កូន អាយុ ៥ឆ្នាំរបស់អ្នកនឹងធ្វើឲ្យលោកអ្នកភ្ញាក់ផ្អើលជាមួយនឹងជំនាញដែល អភិវឌ្ឍន៍ថ្មីរបស់គាត់។ PBS បានឲ្យដឹងថា គាត់នឹងអាចមានសមត្ថភាពប្រើប្រាស់កន្ទ្រៃដើម្បីកាត់ និងចាប់ផ្តើមសរសេរអក្សរបាន។ បណ្តាញជាតិដើម្បីការថែទាំកុមារ (The National Network for Child Care) ឲ្យដឹងថា នៅអាយុ ៥ឆ្នាំ កូនរបស់អ្នកដែលរៀននៅថ្នាក់មតេ្តយ្យ នឹងមានសមត្ថភាពស្លៀកពាក់ដោយខ្លួនឯង ជិះកូនកង់ដែលមានកង់បី ប្រើកាំបិត និងសម លោតរំលងខ្សែ និងចាប់ផ្តើមស្វែងរកអត្ថប្រយោជន៍នៅក្នុងសកម្មភាពនានាដូចជា ការរាំ ឬដាំក្បាលចុះក្រោម និងឥរិយាបថដាំដូងផ្សេងទៀត។ នៅពេលកុមារឈានដល់អាយុ ៦ឆ្នាំ គាត់អភិវឌ្ឍជំនាញបោះ និងចាប់ សមត្ថភាពចងខ្សែស្បែកជើង និងជិះកង់ដែលមានកង់ពីរ។ Kids Growth បានឲ្យដឹងថា កុមារក៏នឹងចាប់ផ្តើមជំនាញរៀនសូត្រដែលពាក់ព័ន្ធនឹងកីឡាមួយ ចំនួនផងដែរដូចជា កីឡាបាល់ទាត់ ឬបេស្បលជាដើម។
អាយុពី ៧ ដល់ ១០ឆ្នាំ
ខណៈ ពេលដែលកូនរបស់អ្នកកំពុងលូតលាស់ គេហទំព័រ Medline Plus ឲ្យដឹងថា ធ្មេញព្រៃកូនរបស់អ្នកនឹងចាប់ផ្តើមបាត់បង់នៅអាយុចន្លោះពី ៧ ទៅ ១០ឆ្នាំ ហើយធ្មេញស្រុកនឹងចាប់ផ្តើមដុះមកវិញ។ នៅអាយុ ១០ ឆ្នាំ កូនរបស់អ្នកអាចសូម្បីតែចាប់ផ្តើមមានដុះរោមប្រដាប់បន្តពូជ និងរោមក្លៀក ហើយចំពោះកុមារីវិញ វដ្ដរដូវដំបូងអាចនឹងចាប់ផ្តើមកើតមាន។ កូនរបស់អ្នកក៏នឹងកាន់តែស្ទាត់ជំនាញខាងជំនាញនានាដែលត្រូវការ ជាចាំបាច់សម្រាប់កីឡាជាក្រុម ហើយសូម្បីតែអាចលេងកីឡាមួយ ឬធ្វើសកម្មភាពរាងកាយផ្សេងទៀតបានយ៉ាងល្អ។
ការលើកទឹកចិត្តការអភិវឌ្ឍរាងកាយ
ក្នុង នាមជាអ្នកថែទាំកុមារម្នាក់ មានរឿងរ៉ាវមួយចំនួនដែលអ្នកអាចធ្វើបានដើម្បីជួយបន្ថែមដល់ការ អភិវឌ្ឍរាងកាយរបស់កូនអ្នក។ លោក Sean Brotherson អ្នកឯកទេសខាងវិទ្យាសាស្រ្តគ្រួសារនៅសាកលវិទ្យាល័យ North Dakota State និយាយថា ទិដ្ឋភាពសំខាន់បំផុតនៃការជួយកុមារឲ្យអភិវឌ្ឍខាងរាងកាយ រួមមានសកម្មភាពជាច្រើន តាមរយៈការជួយផ្តល់ឲ្យកូនៗរបស់អ្នកនូវប្រដាប់ប្រដារក្មេងលេង បែបច្នៃប្រឌិត និងធ្វើឲ្យប្រាកដថា កូនរបស់អ្នកមានទំនាក់ទំនងច្រើនជាមួយមនុស្សចាស់ និងកុមារផ្សេងទៀត។ ដូចគ្នានេះដែរ លោក Sean Brotherson បានផ្តល់យោបល់ឲ្យលោកអ្នកផ្តល់ការលើកទឹកចិត្តឲ្យបានច្រើនដល់ កូនរបស់អ្នក រួមទាំងឱកាសគ្រប់គ្រាន់ក្នុងការឡើង លោត រត់ រំលង រុញ និងទាញ។ ប្រសិនបើអ្នកមិនមានឧបករណ៍ និងរបស់ក្មេងលេងនានានៅផ្ទះសម្រាប់គោលបំណងនេះ ចូរនាំកូនរបស់អ្នកទៅកាន់សួនឧទ្យានក្នុងមូលដ្ឋាន ឬទៅកន្លែហាត់ប្រាណ ដើម្បីឲ្យកូនរបស់អ្នកបញ្ចេញសកម្មភាពផ្នែករាងកាយ។
សុវត្ថិភាពកូនរបស់អ្នក
ការ ធ្វើឲ្យប្រាកដថាកូនរបស់អ្នកមានសុវត្ថិភាព អាចជួយធានាបាននូវការអភិវឌ្ឍន៍ផ្នែកសុខភាព។ ចូរបង្កើតវិធានតឹងរឹង និងច្បាស់លាស់ដែលបង្កើតឲ្យមានការលេងប្រកបដោយសុវត្ថិភាព ហើយអនុវត្តវិធានទាំងនោះឲ្យបានជាប្រចាំ។ យោងតាមគេហទំព័រ Kids Growth ចូរបង្រៀនកូនរបស់អ្នកឲ្យចេះហែលទឹកនៅអាយុប្រហែល ៦ឆ្នាំ ដើម្បីធានាបាននូវសុវត្ថិភាពពីការលង់ទឹក ហើយក៏អនុវត្តវិធាននានានៅអាងហែលទឹក និងការហែលទឹកឲ្យបានតឹងរឹងផងដែរ។ ជានិច្ចកាល ចូរប្រាកដថា កូនរបស់អ្នកពាក់ឧបករណ៍ការពារឲ្យបានគ្រប់គ្រាន់សម្រាប់សកម្មភាព នានាដូចជា ពាក់ពួកការពារនៅពេលជិះកង់ជាដើម។ ចូរអនុវត្តវិធានការសុវត្ថិភាពនៅពេលចាកចេញទៅ និងមកពីសាលារៀន។
រក្សាសិទ្ធ៖ សាលាអន្តរជាតិហ្គោលដិនប្រ៊ីជភ្នំពេញ
