កំហុសដ៏គ្រោះថ្នាក់ចំនួន ៩ ដែលមនុស្សបង្កើតឡើង នៅពេលផ្តល់ការសង្គ្រោះបឋម
យើងស្ទើរតែទាំងអស់គ្នាចងចាំនូវរឿងរ៉ាវជាមូលដ្ឋានមួយចំនួនអំពីវិធាននៃការផ្តល់ការសង្គ្រោះបឋម។ ប៉ុន្តែតើចំណេះដឹងរបស់យើងត្រឹមត្រូវដែរឬទេ ឬក៏ថាតើអ្វីដែលយើងដឹងគឺជាចំណេះដឹងរប៉ាត់រប៉ាយពេកទេ សម្រាប់ជាប្រយោជន៍? Ilya Boyko អ្នកឯកទេសខាងផ្នែកសង្គ្រោះបឋមពន្យល់អំពីកំហុសដែលកើតមានឡើងយ៉ាងទូលំទូលាយ និងគ្រោះថ្នាក់បំផុតដែលមនុស្សបង្កឡើងនៅពេលផ្តល់ជំនួយផ្នែកវេជ្ជសាស្រ្តទៅកាន់មនុស្សផ្សេងទៀត។
នៅ Bright Side យើងសូមផ្តល់អនុសាសន៍ឲ្យយកចិត្តទុកដាក់ដល់វិធានសាមញ្ញៗទាំងនេះ ពោលគឺវិធានទាំងនេះអាចជួយសង្គ្រោះជីវិតរបស់មនុស្សបាន។
1. ការព្យាយាមធ្វើឲ្យខ្លួនលោកអ្នកបែកញើសនៅពេលលោកអ្នកឡើងកម្តៅជាគំនិតមិនល្អ
នៅពេលលោកអ្នកឈឺ ការអារម្មណ៍ថាក្តៅខ្លួន និងរងាញាក់ក្នុងពេលជាមួយគ្នា បង្ហាញថា សីតុណ្ហភាពក្នុងខ្លួនរបស់អ្នកកំពុងកើនឡើង។ នៅពេលយើងយកអ្វីមករុំខ្លួន ដើម្បីឲ្យកក់ក្តៅនោះ សីតុណ្ហភាពរបស់យើងនឹងកើនឡើងកាន់តែខ្លាំង។ បើទោះជាកំដៅជួយយើងឲ្យប្រឆាំងនឹងការឆ្លងជំងឺក៏ដោយ ក៏សីតុណ្ហភាពក្នុងខ្លួនដែលកើនឡើងខ្ពស់ជាង ៣៨អង្សា ពិតជាប៉ះពាល់ដល់រាងកាយជាជាងជួយដល់រាងកាយ។
ប្រសិនបើអ្នកមានសីតុណ្ហភាពខ្ពស់ រួមទាំងរងាញាក់ផងនោះ អ្នកចាំបាច់ត្រូវតែធ្វើឲ្យខ្លួនប្រាណរបស់អ្នកងាកមករកត្រជាក់មកវិញប្រសើរជាងធ្វើឲ្យកាន់តែក្តៅ។
2. ចូរកុំដាក់អ្វីមួយទៅក្នុងមាត់របស់អ្នកដែលកំពុងកើតជំងឺឆ្កួតជ្រូក ឬស្កន់ជាន់
លោកអ្នកអាចធ្វើឲ្យធ្មេញរបស់អ្នកណាម្នាក់បាក់ ប្រសិនបើលោកអ្នកដាក់អ្វីមួយទៅក្នុងមាត់របស់គេ។ ក្នុងអំឡុងពេលប្រកាច់ (ញាក់) អ្នកដែលកើតជំងឺឆ្កួតជ្រូកមិនអាចខាំអណ្តាតខ្លួនឯងនោះទេ ដោយសារការប្រកាច់នោះត្រូវបានជំរុញដោយកម្លាំងខ្លាំង។ ពួកគេអាចត្រឹមតែខាំអណ្តាតរបស់ខ្លួនតិចតួចប៉ុណ្ណោះ ប៉ុន្តែការណ៍នេះនឹងមិនបង្កឲ្យមានគ្រោះថ្នាក់ធ្ងន់ធ្ងរណាមួយនោះឡើយ។ អ្វីដែលប្រសើរបំផុតដែលលោកអ្នកអាចធ្វើដើម្បីជួយពួកគេនោះគឺយកអ្វីដែលទន់ៗទៅទ្រាប់ក្បាលរបស់ពួកគេ ដោយសារការធ្វើដូច្នេះនឹងជួយពួកគេឲ្យជៀសផុតពីការទទួលរងការប៉ះទង្គិចក្បាលណាមួយដែលបង្កឲ្យរបួសដល់ខួរក្បាល។ នៅពេលការប្រកាច់នោះចប់ ចូរបង្វិលពួកគេឲ្យដេកចំហៀងវិញ។
3. កុំលាបថ្នាំប្រឆាំងនឹងការរលាកភ្លាមៗនៅកន្លែងដែលរលាក
នៅពេលរលាកស្បែក ស្បែកទទួលរងកម្តៅខ្លាំងជ្រុលដែលធ្វើឲ្យកម្តៅចូលជ្រៅទៅក្នុងកោសិការាងកាយ។ អ្វីដ៏ប្រសើរបំផុតដែលត្រូវធ្វើនៅក្នុងស្ថានភាពនេះគឺដាក់ត្រាំកន្លែងដែលរលាកនោះទៅក្នុងទឹកត្រជាក់រយៈពេលប្រហែល ១៥នាទី។ ការធ្វើដូច្នេះនឹងជួយធ្វើឲ្យកម្តៅដែលខ្លាំងជ្រុលនោះសាយភាយចេញមកវិញ។ ចូរកុំលាបអ្វីមួយភ្លាមៗនៅលើស្បែក ដោយសារការធ្វើដូច្នេះនឹងធ្វើឲ្យកម្តៅមិនអាចសាយភាយចេញមកវិញបាន។ ការលាបអាចធ្វើទៅបានបន្ទាប់ពីរយៈពេល ២០នាទីក្រោយមក ឬយូរជាងនេះ។
4. ចូរកុំអូសទាញអ្នកដែលអាចរងរបួសនៅទីកន្លែងណាមួយដោយគ្មានវត្តមានអ្នកវិជ្ជាជីវៈផ្នែកវេជ្ជសាស្រ្ត
ប្រសិនបើឧប្បតិ្តហេតុកើតឡើងនៅតាមផ្លូវ ចូរកុំប៉ះពាល់អ្នករងរបួស ហើយកុំព្យាយាមទាញពួកគេចេញពីរថយន្តដោយខ្លួនអ្នកផ្ទាល់។ ទង្វើរបស់អ្នកនឹងគ្រាន់តែធ្វើឲ្យបញ្ហាកាន់តែធ្ងន់ធ្ងរប៉ុណ្ណោះ។ វិធាននេះអាចរំលោភបានលុះត្រាតែស្ថិតក្នុងស្ថានភាពធ្ងន់ធ្ងរបំផុត ដូចជាប្រសិនបើរថយន្តត្រូវភ្លើងឆេះជាដើម។ ខាងក្រោមនេះគឺជាអ្វីដែលលោកអ្នកចាំបាច់ត្រូវធ្វើជំនួសឲ្យការប៉ះពាល់ ឬអូសទាញអ្នករងគ្រោះ៖
- ទូរស័ព្ទហៅរថយន្តសង្គ្រោះបន្ទាន់។
- ប្រសិនបើលោកអ្នកអាចធ្វើបានបញ្ឈប់ម៉ាស៊ីនរថយន្តហើយកាត់ផ្តាច់ថាមពលពីអាគុយរថយន្ត។
- បញ្ឈប់ការហូរឈាម។
- ជួយជនរងគ្រោះឲ្យរក្សាភាពស្ងប់ស្ងាត់។
5. ប្រសិនបើអ្នកណាម្នាក់ឈ្លក់ ចូរកុំរឹតខ្នងរបស់គាត់
ប្រសិនបើលោកអ្នករឹតខ្នងអ្នកឈ្លក់ អ្នកនឹងកាន់តែបង្កឲ្យអ្វីដែលកំពុងជាប់នៅក្នុងបំពង់ខ្យល់ កាន់តែធ្លាក់ចូលក្នុងបំពង់ខ្យល់របស់ពួកគេបន្ថែមទៀតប៉ុណ្ណោះ។ អ្វីដែលលោកអ្នកគួរធ្វើជំនួសឲ្យការរឹតខ្នងនោះគឺជួយអ្នកដែលឈ្លក់នោះឲ្យអោនចុះ ធ្វើឲ្យប្រាកដថាពួកគេរក្សាភាពស្ងប់ស្ងាត់ ហើយប្រាប់ពួកគេឲ្យដកដង្កើមចូលយឺតៗវែងៗពីរដង។ ការធ្វើដូច្នេះនឹងជួយបន្ធូរបន្ថយការឈ្លក់នោះហើយជួយឲ្យវត្ថុដែលរាំងស្ទះបំពង់ខ្យល់របស់ពួកគេចេញមកក្រៅវិញ។
6.ចូរកុំព្យាយាមទាញអណ្តាតរបស់មនុស្សដែលកំពុងសន្លប់
ការដេកផ្ងារបង្កគ្រោះថ្នាក់ដល់អ្នកដែលកំពុងសន្លប់ ដោយសារអណ្តាតរបស់ពួកគេអាចធ្លាក់ចុះ និងបិទផ្លូវដង្ហើមរបស់ពួកគេ។ ដើម្បីធ្វើឲ្យប្រាកដថាបញ្ហានេះមិនឲ្យកើតឡើងនោះ គឺគ្រាន់តែបង្វិលអ្នករងគ្រោះឲ្យដេកចំហៀង ឬបង្វិលក្បាលរបស់ពួកគេត្រលប់មកវិញប៉ុណ្ណោះ។ លោកអ្នកមិនគួរព្យាយាមទាញអណ្តាតចេញក្រៅមាត់របស់ពួកគេឡើយ។
7. ចូរកុំចងក្រណាត់សម្រាប់ឃាត់ឈាមលើរបួស ប្រសិនបើការហូរឈាមនោះមិនមែនបណ្តាលមកពីការដាច់សរសៃអាក់ទែ
ការហូរឈាមដែលបណ្តាលមកពីដាច់សរសៃរអាក់ទែ ងាយស្រួលដឹងណាស់ ហើយមិនមែនអាស្រ័យលើពណ៌របស់ឈាមដូចដែលអ្នកអាចធ្លាប់បានដឹងនៅសាលារៀននោះឡើយ។ នៅក្នុងសរសៃអាក់ទែ ឈាមត្រូវបានច្របាច់នៅក្នុងល្បឿនដ៏លឿនស្ថិតក្រោមសម្ពាធ ដូច្នេះឈាមហូរចេញពីរបួសមិនមែនហូរចេញយឺតៗនោះទេ ប៉ុន្តែហូរចេញលឿនដូចទៅនឹងប្រភពទឹកដូច្នេះដែរ។ នៅក្នុងករណីបែបនេះ លោកអ្នកចាំបាច់ត្រូវសង្កត់សរសៃអាក់ទែនៅលើក្រលៀន ឬស្ថិតនៅក្រោមក្លៀកភ្លាមៗ ហើយទាញអវៈយវៈឲ្យខិតមកជិតដងខ្លួន ដោយប្រើប្រាស់ក្រណាត់សម្រាប់ចងឃាត់ឈាម ឬខ្សែក្រវ៉ាត់រុំជុំវិញសំលៀកបំពាក់។ ប្រសិនបើមានហូរឈាមចេញពីសរសៃវ៉ែន គួរយកបង់មករុំ ប៉ុន្តែមិនប្រើប្រាស់ក្រណាត់សម្រាប់ចង់ឃាត់ឈាមទេ ដោយសារការប្រើក្រណាត់សម្រាប់ចង់ឃាត់ឈាមនេះ អាចបណ្តាលឲ្យឈាមហូរចេញពីអវៈយវៈ ដែលក្រោយមកមិនអាចជួយឲ្យឈាមហូរចូលវិញបាន។
8. ចូរកុំត្រដុសផ្នែកនៃរាងកាយដែលរងគ្រោះដោយសារការត្រជាក់ខ្លាំង
នៅពេលដែលយើងត្រដុសចុងដៃចុងជើងដែលរងការត្រជាក់ខ្លាំង យើងធ្វើឲ្យខូចដល់សរសៃកាពីលែររបស់យើង ដែលបណ្តាលឲ្យស្ថានភាពមានភាពអាក្រក់ឡើង។ ទឹកក្តៅក៏ជាវិធីសាស្រ្តមួយជួយដល់យើងក្នុងករណីនេះដែរ។ ប្រសិនបើលោកអ្នករងគ្រោះដោយសារការត្រជាក់ខ្លាំងពេក លោកអ្នកគួរព្យាយាមកំដៅផ្នែកនៃរាងកាយដែលរងគ្រោះនោះយឺតៗ ដោយដាក់ដៃរបស់លោកអ្នកចូលទៅក្នុងទឹកត្រជាក់ ហើយដំឡើងសីតុណ្ហភាពទឹកនោះសន្សឹមៗ។
9. វាយតម្លៃសមត្ថភាពរបស់លោកអ្នក ហើយគិតឲ្យសមហេតុផលមុននឹងលោកអ្នកព្យាយាមជួយអ្នកណាម្នាក់
ក្នុងគ្រាអាសន្ន ជានិច្ចកាល លោកអ្នកគួរពិចារណាជាមុនថាតើសកម្មភាពអ្វីដែលអាចបង្កឲ្យលោកអ្នកមានគ្រោះថ្នាក់ ហើយលោកអ្នកគួរជួយ តែនៅពេលដែលលោកអ្នកប្រាកដថា អ្នកនឹងមិនបង្កឲ្យមានគ្រោះថ្នាក់ដល់ខ្លួនលោកអ្នកផ្ទាល់តែប៉ុណ្ណោះ នៅពេលដែលលោកអ្នកជួយគេ។ ឧទាហរណ៍ ប្រសិនបើលោកអ្នកប៉ះពាល់មនុស្សដែលទទួលរងការឆក់អគ្គិសនី នៅពេលនោះជនរងគ្រោះនឹងមានដល់ទៅពីរនាក់ មិនមែនតែម្នាក់នោះទេ។ ក្នុងករណីនេះ លោកអ្នកចាំបាច់ត្រូវបិទផ្តាច់ចរន្តនៅឯប្រភពអគ្គិសនី ឬប្រើប្រាស់ឧបករណ៍ធ្វើពីឈើ ដើម្បីបំបែកជនរងគ្រោះចេញពីប្រភពចរន្ត។
លោកអ្នកចាំបាច់ត្រូវចងចាំថា ក្នុងករណីគ្រាអាសន្នណាមួយ សកម្មភាពនានាដែលមិនបានគិតដល់ អាចកាន់តែធ្វើឲ្យស្ថានភាពនោះកាន់តែមានភាពធ្ងន់ធ្ងរជាងការដែលយើងមិនធ្វើសកម្មភាពអ្វីសោះ។ គ្រាន់តែទទួលយកដំបូន្មានបានហើយ ប្រសិនបើអ្នកប្រាកដថា វានឹងជួយបាន។ ហើយត្រូវទូរស័ព្ទទៅរកសេវាសង្គ្រោះបន្ទាន់ភ្លាមៗ។
ដកស្រង់និងប្រែសម្រួលពីគេហទំព័រ BrightSide.me