ប្រាំជំហ៊ានដើម្បីចិញ្ចឹមកូនវ័យជំទង់អោយបានល្អ
ដោយ Melissa Lewis
ការចិញ្ចឹមបីបាច់ក្មេងវ័យជំទង់មិនមែនជារឿងងាយស្រួលនោះទេ ប៉ុន្តែក៏មិនគួរមានអារម្មណ៍ហាក់ដូចជាថាអ្នកកំពុងជម្នះនឹង “រឿងរ៉ាវដ៏អាក្រក់” ម្តងហើយម្តងទៀតយ៉ាងដូច្នេះដែរ។ ការស្រែក និងការស្តីប្រដៅនឹងមិនបានការនោះទេជាមួយនឹងក្មេងជំទង់ដែលមានចរិតនៅក្មេងពិបាកគ្រប់គ្រងនោះ។ ប្រសិនបើអ្នកដោះស្រាយជាមួយក្មេងជំទង់ដែលចរិតមិនទាន់ចាស់ទុំតាមរយៈមធ្យោបាយត្រជាក់ អ្នកអាចមានសង្ឃឹមច្រើនថានឹងទទួលបានលទ្ធផលប្រកបដោយភាពវិជ្ជមាន។
ជំហ៊ានទី១
អ្នកណាក៏ដឹងដែរថាក្មេងជំទង់គឺជាមនុស្សប្រភេទយ៉ាងដូម្តេច។ ដូច្នេះ ចូរព្យាយាមរក្សាការផ្សារភ្ជាប់ទៅនឹងអ្វីដែលគាត់កំពុងតែគិត ដោយធ្វើឲ្យគាត់មានអារម្មណ៍ថា គាត់ទទួលបានការយកចិត្តទុកដាក់ និងការយល់ចិត្ត។ នៅពេលអ្នកនិយាយទៅកាន់កូនរបស់អ្នកដោយវិធីដែលពោរពេញដោយក្តីស្រលាញ់ កូនដែលស្ថិតក្នុងវ័យជំទង់របស់អ្នកនឹងកាន់តែចង់ស្តាប់អ្នក និងទទួកយកអ្វីដែលអ្នកនិយាយ។
ជំហ៊ានទី២
ចូរកំណត់ព្រំដែន និងរក្សាភាពរឹងមាំច្បាស់លាស់។ ក្នុងតំណាក់កាលយុវវ័យ គឺជាពេលដែលកូនៗចង់បានភាពឯករាជ្យ និងសេរីភាព ប៉ុន្តែពូកគេនៅតែត្រូវការការណែនាំ។ ការដាក់បញ្ជារជាមូលដ្ឋាន និងការអនុវត្តបទបញ្ជារទាំងនោះ បង្កើតឲ្យមានបរិយាសនៃការគោរពនៅក្នុងផ្ទះរបស់អ្នក ប៉ុន្តែចូរកុំភ្លេចគោរពកូនរបស់អ្នកវិញផង។ ប្រសិនបើគាត់រអ៊ូរទាំថា មិត្តភ័ក្តិរបស់គាត់ទាំងអស់មានវិន័យតិចជាងនេះ ចូរពិរចារណាផ្តល់ពេលវេលាឲ្យគាត់បន្ថែមទៀត។ ចូរផ្តល់រង្វាន់សម្រាប់អ្វីដែលគាត់ធ្វើត្រឹមត្រូវ ហើយគាត់ប្រហែលជាអាចចាប់ផ្តើមធ្វើអ្វីដែលត្រឹមត្រូវនេះបន្ថែមទៀតនៅក្នុងវ័យរបស់ពួកគេនេះ។
ជំហ៊ានទី៣
ចូរបង្រៀនគាត់ឲ្យចេះឯករាជ្យម្ចាស់ការលើខ្លួនឯង។ ប្រសិនបើអ្នកផ្តល់ឲ្យកូនរបស់អ្នកនូវការទទួលខុសត្រូវកាន់តែច្រើន និងជំនាញនានាដែលគាត់ត្រូវការដើម្បីគ្រប់គ្រងការទទួលខុសត្រូវនោះ គាត់ប្រហែលជានឹងចាប់ផ្តើមប្រព្រឹត្តខ្លួនក្នុងលក្ខណៈកាន់តែចាស់ទុំ។ ចូរលើកទឹកចិត្តគាត់ឲ្យស្វែងរកការងារធ្វើ ដូច្នេះគាត់អាចរៀនសូត្រអំពីជំនាញថ្មីៗ ហើយពឹងផ្អែកលើការសន្សំប្រាក់របស់គាត់សម្រាប់ការចូលរៀនមហាវិទ្យាល័យ ឬការទិញរថយន្ត។ ចូរបង្ហាញគាត់អំពីរបៀបបោកសំលៀកបំពាក់ ឬចំអិនអាហារសាមញ្ញៗ។ គាត់នឹងចាប់ផ្តើមលើកសរសើរចំពោះកម្លាំងថាមពលដែលបានចំណាយលើការមើលថែទាំគាត់ផ្ទាល់ ហើយគាត់នឹងឈប់រំពឹងថា អ្នកនឹងធ្វើអ្វីគ្រប់យ៉ាងសម្រាប់គាត់តទៅទៀត។
ជំហ៊ានទី៤
ចូរអនុញ្ញាតឲ្យគាត់ស្វែងយល់អ្វីដែលគាត់ចង់។ ក្មេងជំទង់គ្រាន់តែចូលចិត្ត “ចំណាយពេលវេលាខាងក្រៅ” ប៉ុណ្ណោះ ហើយពេលខ្លះ ចំពោះពេលវេលាដែលកូនរបស់អ្នកចំណាយលើការមិនបានធ្វើអ្វីជាក់លាក់ណាមួយនោះ ក៏វាមានតម្លៃផងដែរ។ តែប្រសិនបើគាត់ចេះតែទៅសំកុកនៅតែក្នុងម៉ល (ផ្សាទំនើប) គាត់ប្រហែលជានឹងមិនក្លាយជាមនុស្សដែលមានភាពចាស់ទុំនោះទេ។ ដោយឡែក ប្រសិនបើគាត់កំពុងលេងហ្គីតាខ្លាំងៗនៅក្នុងបន្ទប់នោះ គាត់អាចកំពុងរៀនសូត្រមេរៀនដ៏មានតម្លៃមួយអំពីសេចក្តីព្យាយាម។ ចូរផ្តល់ឲ្យកូនរបស់អ្នកនូវពេលវេលាដែលគាត់ត្រូវការ ដើម្បីស្វែងយល់អំពីខ្លួនគាត់ផ្ទាល់ និងជីវិតទូទៅ។
ជំហ៊ានទី៥
ចូរទុកឲ្យគាត់ទទួលរងការបរាជ័យផង។ ភាពចាស់ទុំកើតមកពីការរៀនសូត្រអំពីមេរៀនជីវិត ហើយកូនរបស់អ្នកនឹងមិនមានឱកាសរៀនសូត្រពីកុំហុសរបស់គាត់នោះទេ ប្រសិនបើអ្នកជួយដោះស្រាយនូវរាល់បញ្ហារបស់គាត់ ឬទប់ស្កាត់គាត់ពីការប្រថុយប្រថានដែលល្អនានា។ ចូរគាំទ្រដល់បំណងប្រាថ្នារបស់គាត់ ដើម្បីធ្វើសេចក្តីសម្រេចចិត្តមួយចំនួនដោយខ្លួនគាត់ផ្ទាល់ ហើយក្រោយមកដកខ្លួនចេញបន្តិចវិញ។ ប្រសិនបើគាត់ចង់គេចម៉ោងរៀនរាំនៅសាលាដោយសារគាត់មានអារម្មណ៍ថា ការរាំនោះមានភាពបុរាណជ្រុលសម្រាប់រសជាតិរបស់គាត់ ចូរកុំឈ្លោះគ្នាដោយសារតែបញ្ហានេះ។ នៅពេលគាត់អាយុកាន់តែច្រើន គាត់ប្រហែលជានឹកឃើញរឿងនេះឡើងវិញ ហើយដឹងថា គាត់ខកខានដោយសារការមិនបានត្រៀមខ្លួន និងការមិនចូលរួមក្នុងថ្នាក់មួយនេះ។ ប្រសិនបើគាត់នឹកឃើញ និងដឹងខ្លួនយ៉ាងដូច្នេះមែន គាត់នឹងដឹងថាមិនត្រូវបង្កើតឲ្យមានកំហុសប្រហាក់ប្រហែលគ្នានេះទៀតឡើយនៅថ្ងៃអនាគត។
ត្រូវប្រយ័ត្ន
បើទោះជាការកំណត់ព្រំដែនអាចជួយរក្សាក្មេងដែលមិនទាន់មានភាពចាស់ទុំឲ្យស្ថិតនៅក្រោមបង្គាប់ក្តី លោកបណ្ឌិត John McKinnon ព្រមានអំពីការបណ្តោយពេក និងការរឹតបន្តឹងពេកផងដែរ។ ប្រសិនបើលទ្ធផលនៃឥរិយាបថរបស់គាត់មានភាពមិនសមរម្យ ឬអ្នកមិនបានឲ្យពួកគេទទួលស្គាល់នូវលទ្ធផលនៃឥរិយាបថទាំងនោះទេ អ្នកនឹងបាត់បង់ការជឿទុកចិត្តទាំងអស់។ បញ្ហាឥរិយាបថមួយចំនួនមានភាពខុសពីឥរិយាបថធម្មតា។ ចូរព្យាយាមស្វែងរកការប្រឹក្សាសម្រាប់ក្មេងជំទង់ណាដែលកំពុងចូលរួមប្រព្រឹត្តិសកម្មភាពដែលគ្រោះថ្នាក់នានា។
ដំបូន្មានបន្ថែម
អ្នកចិត្តវិទ្យាខាងផ្នែកកុមារលោក Kenneth N. Condrell ពន្យល់ថា ការតវ៉ាមិនស្តាប់បង្គាប់គឺជាធម្មជាតិដែលតែងតែកើតឡើងចំពោះក្មេងវ័យជំទង់នានា។ ចូរឲ្យកូនរបស់អ្នកបង្ហាញភាពឯករាជ្យដែលកំពុងកើនឡើងរបស់គាត់តាមវិធីដែលសមរម្យ។ ប្រសិនបើវាមិនមានផលប៉ះពាល់អវិជ្ជមានចំពោះអនាគតរបស់គាត់ វាកាន់តែមានប្រសិទ្ធភាពក្នុងការមិនប្រឆាំងទៅនឹងការបង្ហាញពីភាពឯករាជ្យនោះ។
ការចិញ្ចឹមក្មេងជំទង់ដែលមានភាពចាស់ទុំមានការពាក់ព័ន្ធលើសពីការប្រាស្រ័យទាក់ទង និងវិន័យ។ ការសម្រួលឥរិយាបថរបស់ឪពុកម្តាយផ្ទាល់ គឺមានភាពចាំបាច់ណាស់ ប្រសិនបើអ្នកចង់បង្កើតជាគំរូមួយ ដែលក្មេងជំទង់អាចរៀនសូត្រ និងគោរពតាមឆាប់រហ័សនោះ។
រក្សាសិទ្ធិ៖ សាលាអន្តរជាតិហ្គោលដិនប្រ៊ីជភ្នំពេញ
